מצודת ציון על תהלים נב

בְּבוֹא דּוֹאֵג הָאֲדֹמִי וַיַּגֵּד לְשָׁאוּל וַיֹּאמֶר לוֹ בָּא דָוִד אֶל־בֵּית אֲחִימֶלֶךְ׃

האדומי. מתגורר היה באדום:

הַוּוֹת תַּחְשֹׁב לְשׁוֹנֶךָ כְּתַעַר מְלֻטָּשׁ עֹשֵׂה רְמִיָּה׃

הוות. דברי שבר: כתער. סכין שמגלחין בה: מלוטש. מחודד:

גַּם־אֵל יִתָּצְךָ לָנֶצַח יַחְתְּךָ וְיִסָּחֲךָ מֵאֹהֶל וְשֵׁרֶשְׁךָ מֵאֶרֶץ חַיִּים סֶלָה׃

יתצך. מלשון נתיצה והריסה: לנצח. לעולם: יחתך. מלשון חתת ושבר כמו ואל תחת (יהושע א׳): ויסחך. ענין הריסה ועקירה כמו בית גאים יסח ה׳ (משלי ט״ו:כ״ה):

הִנֵּה הַגֶּבֶר לֹא יָשִׂים אֱלֹהִים מָעוּזּוֹ וַיִּבְטַח בְּרֹב עָשְׁרוֹ יָעֹז בְּהַוָּתוֹ׃

יעוז. תחזק:

וַאֲנִי כְּזַיִת רַעֲנָן בְּבֵית אֱלֹהִים בָּטַחְתִּי בְחֶסֶד־אֱלֹהִים עוֹלָם וָעֶד׃

רענן. לחה ורטובה: